NJIA KUMI TUNAVYOWEZA KUONYESHA UPENDO KWA MAMA MARIA

Mara nyingi tunajadili ni nani anaweza kuwa mwanamichezo bora, mwanamuziki bora, mwandishi bora, mwanamuziki bora; pia, ni lazima isemwe, kuna mama bora. Kwa mbali na pekee yake Bikira Maria alikuwa, ni, na daima atakuwa, mama bora wa wote.

Huku tukisema hivyo, Akina  wote duniani  wanapaswa kutambua ukweli kwamba Maria ni mama bora wa wote na kuyatafakari maneno, matendo, ishara, sura, nia, na maisha ya Maria ili waweze kuwa mama bora zaidi na Zaidi.

Maria ni Mama wa Mungu na ni Mama wa Kanisa, lakini pia Maria ni Mama yetu mpendwa! Tujaribu kumpendeza Maria, Mama yetu na  hakika akina mama wengi ulimwenguni watapiga hatua kubwa katika kuwa mama bora siku zote za maisha yao!

Leo nitaelezea kwa namna ya pekee njia kumi tofauti ambazo tunaweza kuonyesha upendo mkubwa kwa Mama Maria, na kupitia maombezi yake yenye nguvu zaidi, atapata kwa ajili yetu neema bora zaidi kutusaidia kuwa watakatifu ambao tunaitwa kuwa, na wengi wetu kama akina mama.

1. Zungumza Naye.

Tunapaswa kuwa na desturi ya kuzungumza na Maria, Mama yetu mpendwa, mara kwa mara. Kumweleza, kusema naye kwa moyo wetu, kumpenda, na kuweka maisha yetu yote mikononi mwake ni jambo linalompendeza sana, pamoja na Mwana wake Yesu, Mwana wa Mungu na Mwana wa Bikira Maria. Maria ni kielelezo chetu, mwongozo wetu, rafiki yetu, na Mama yetu mpendwa. Anatupenda sana na anatamani kuwa na mazungumzo mara kwa mara na sisi.

Tuanze leo! Marafiki wazuri wanawaza kuhusu wenzao na kuzungumza mara kwa mara! Maria ni Mama yetu, lakini pia ni rafiki na mshauri wetu.

2. Anza Siku Yako na Maria

Kila asubuhi tunapoamka, hatua yetu ya kwanza inapaswa kuwa sala, na ni sala gani? Kwa nini usianze siku yako kwa kujitoa kabisa kwa Yesu, katika yote unayosema, unayofanya na unayofikiria, kupitia Moyo Mtakatifu wa Maria? Mpe Yesu kupitia Maria macho yako, masikio yako, akili yako, moyo wako, mwili wako, na hata nia zako—kwa neno moja, mpe kila kitu kwa Yesu kupitia Mama Maria. Ni muhimu sana kuanza siku yetu vizuri kupitia Moyo wa Maria!

Hapa kuna sala ya Kujiweka Wakfu kwa Maria. Ikiwa utapenda, unaweza kusali sala hii hapa chini. Ikiwa huna skapulari ya rangi ya kahawia, itapendeza   kununua moja na kuvaa skapulari ya Mama Maria kama ishara kwamba wewe ni wake na unakuwa chini ya ulinzi wake! Vaa skapulari wakati wote, isipokuwa wakati wa kuoga.

Maria, Malkia wangu na Mama yangu, najitolea kwako kabisa. Kuonyesha ibada yangu kwako, nakutolea leo macho yangu, masikio yangu, kinywa changu, mwili wangu wote bila kizuizi. Kama vile mimi ni wako, Mama mpendwa, nihifadhi na unilinde kama mali yako na milki yako. Amina.

3. Mwambie Mama Maria kuwa Unampenda

Mama kamwe hachoki kusikia mtoto akisema: "Mama, nakupenda sana; wewe ni bora!" wakati mwingine tunaweza kukumbana na kishawishi  kwa kusema hivi: "Tayari anajua, kwa nini kumwambia kitu ambacho tayari anakijua?" Kweli, mama mzuri labda tayari anajua. Hata hivyo, bado anapenda kusikia maneno hayo. Kwa kusema: "Mama, nakupenda sana", moyo wa mama yako utaruka kwa furaha.

Hivyo ndivyo inavyopaswa kuwa kwa Mama yetu Mtakatifu. Kwa maneno rahisi kabisa tunaposema: "Mama Maria, nakupenda", basi Maria, Mama wa Mungu, hupata furaha kubwa katika Moyo wake safi na Mtakatifu. Hivyo, kila wakati, tukumbuke kusema: "Mama Maria, nakupenda!"

4. Tembea Naye

Kila tunaposafiri, iwe ni safari fupi au ndefu, tunapaswa kumwalika Mama Maria atembee Pamoja nasi. Yeye ni rafiki mwema katika  safari na anaweza kutulinda kutokana na hatari nyingi katika safari zetu, iwe ni hatari za kimwili au za kimaadili.

5. Fuata Mfano wa Maria

Katika maisha yetu kuna wale watu Fulani tunawapenda sana na kuwaheshimu sana , mara nyingi inatupelekea kuiga tabia zao na kutaka kufanana nao, na tunapowaiga inapelekea kuitwa wafuasi wao. Mtakatifu Louis de Montfort anasisitiza juu ya sifa kumi kuu za Maria ambazo tunapaswa kujitahidi kuziiga: unyenyekevu wake wa dhati, imani hai, utii ulio kipofu, Roho ya kusali daima, kujinyima, usafi ulio zaidi, upendo mkubwa, uvumilivu wa kishujaa, wema wa kimalaika, na hekima ya kimbingu. (True devotion to Mary, Mtakatifu Louis de Montfort #108)

 

6. Kumtegemea na Kumkabidhi Maria

Ikiwa tunamwamini mtu kwa dhati, basi tunaweza kumkabidhi mahangaiko yetu kwake, tukiwa na hakika kwamba mtu huyu maalumu atatujali na kutulinda. Fikiria hili, Mungu Baba alimkabidhi Mwana wake pekee katika ulinzi wa Maria. Kwa hiyo, tunaweza kukabidhi Maisha yetu katika ulinzi wa  Maria, Mama yetu mpendwa na mwenye upendo zaidi. "Haijasikika kamwe kwamba ulimuacha mtu aliyekimbilia msaada na maombezi yako." (Memorare, Mtakatifu Bernardo)"

7. Mwambie Maria matatizo  na maanguko yako

Tunaweza kushawishiwa na adui, shetani, ambaye hakika anamchukia Maria, kujisikia kizuizi katika kumwambia Mama Maria matatizo yetu na mateso makubwa. Badala yake, iwe kinyume chake! Mama bora, Maria anajua vizuri kwamba wakati mtoto anapoumia, na kujeruhiwa, ndipo anapohitaji upendo mwororo na msaada zaidi. Hivyo ndivyo inavyopaswa kuwa kwetu!

Katika siku zinazoonekana kuwa na mawingu mazito, na kusikitisha kabisa katika undani wa roho zetu, ndipo tunapohitaji kufungua na kuzungumza na Mama Maria. Maria ni kimbilio kwa wenye dhambi na afya ya wagonjwa—hivi ni vyeo viwili kwa Maria katika Litania zake maarufu!

8. Mwite Maria Unapokuwa majaribuni.

Maisha yetu ni ya mapambano ya mara kwa mara; sisi ni askari wa Yesu na Mama Maria pia. Hii inamaanisha tuko kwenye uwanja wa vita wa mara kwa mara. Maadui wetu ni watatu: shetani, mwili, na dunia. Tukijua ukweli huu wa kina wa vita vya kiroho, tunapaswa kuliita Jina Takatifu la Maria katika hali ya vita na ushindi utakuwa wetu!

Vita vya Lepanto vilithibitisha ushindi mkubwa kupitia kumwita Maria na kusali Sala ya Rozari Takatifu, kwa ushawishi wa Papa Mtakatifu Pius V. Tuweke matatizo yetu mikononi mwa Maria, ambaye ni hodari kuliko jeshi lote lililo tayari kwa vita! Jina la Maria pekee linaleta hofu na woga katika jehanamu yote

9. Eneza  Upendo kwa Maria Kama Mama

Ikiwa kweli tumepata upendo  wa Maria katika maisha yetu ya kila siku, bila shaka tutataka kumfanya Mama Maria ajulikane kote. Maria hapendwi na kuheshimiwa kwa sababu moja kuu: hajulikani! Anawezaje kujulikana? Kwa njia nyingi! Frisha kusoma vitabu vizuri kuhusu Maria kama vile The Glories of Mary kilichoandikwa na Mt. Alphonsus Liguori, True Devotion to Mary kilichoandikwa na Mt. Louis de Montfort, na Mater Redemptoris na The Blessed Virgin Mary and the Rosary vyote vilivyoandikwa na Papa Mtakatifu John Paul II.

Hamasisha wengine kusali  Sala Takatifu ya Rozari na kuisali kila siku, toa Rozari pamoja na vipeperushi juu ya jinsi ya kusali Rozari, na mwishowe, himiza kuvaa Skapulari ya Rangi ya Kahawia ya Mtakatifu Wa Karmeli.

10. Kufa Kwenye Mikono ya Maria

Wakati muhimu zaidi katika maisha yetu ni wakati tunapokufa. Wakati huo utaamua kwa milele, hatima yetu ya milele—au mbinguni au jehanamu. Kwa nini usijiandae kufa kwa neema, kufa kifo kitakatifu, angalau mara 50 kwa siku? Jinsi gani, unaweza kuuliza? Kwa kusali Rozari Takatifu kila siku. Kila wakati tunaposali Salamu Maria, tunajiandaa kwa kifo kitakatifu na furaha na maneno haya: Maria Mtakatifu Mtakatifu Mama wa Mungu utuombee, sisi wakosefu sasa na saa ya kufa kwetu. AMINA.

Kwa hiyo, tufurahi  kwa kutambua kwa  kina kwamba sote tuna Mama wa mbinguni, Maria Mama wa Mungu, Mama wa Kanisa, na Mama yetu mpendwa. Anatujua, anatujali, anatulinda, lakini hasa, anatupenda! Kwa kweli, katika nyakati za majaribu, mapambano, na vita vikali vya maisha, tutafute kimbilio letu katika Moyo Mtakatifu wa Maria na Moyo Mtakatifu wa Yesu!