Ibada ya Jumamosi Tano za Kwanza za Mwezi ni Nini?

 

Ulimwengu wetu una mambo mengi yanayouma na kutatiza—chuki, vurugu, na kupotea kwa maadili. Wakati mwingine tunaona hatuna nguvu ya kubadilisha chochote. Lakini Mungu ametupa silaha mbili rahisi za kiroho: Moyo wa Yesu na Moyo wa Mama Maria.

Wengi wetu tunaijua ibada ya Ijumaa ya Kwanza kwa ajili ya Moyo Mtakatifu wa Yesu. Lakini leo nataka nikupe siri ya ibada pacha yake: Jumamosi Tano za Kwanza kwa ajili ya Mama Maria.

Shida ni Ipi?

Mwaka 1917, Mama Maria alitokea Fatima, Ureno, kwa watoto watatu wachungaji. Alionya kuwa ulimwengu utapitia magumu mengi kama wanadamu wasipokubali kutubu.

Mwaka 1930, Yesu alimweleza mmoja wa wale watoto (Sista Lucia) kuwa Moyo wa Mama yake unajeruhiwa sana na aina tano za makosa yanayofanywa na wanadamu:

1. Watu wanaokataa kwamba Maria alizaliwa bila dhambi ya asili.
2. Watu wanaokataa ubikira wake.
3. Watu wanaokataa kwamba yeye ni Mama wa Mungu na Mama yetu sote.
4. Watu wanaofundisha watoto wadogo kumdharau au kumchukia Mama Maria.
5. Watu wanaoharibu au kudhihaki sanamu na picha zake takatifu.

Kila mara watu wanapofanya mambo haya, ni kama wanachoma miiba kwenye moyo wa Mama Maria. Ibada hii ipo ili kuiondoa hiyo miiba na kumfariji mama yetu Bikira Maria.

Unatakiwa Kufanya Nini? (Mambo 4 Tu)

Ili kufanya ibada hii, unachotakiwa kufanya ni kutenga Jumamosi ya kwanza ya miezi mitano mfululizo (miezi 5 bila kuruka mwezi), na kufanya mambo haya manne kwa nia ya kumfariji Mama Maria:

• Nenda Kwenye Kitubio: (Ikiwa huwezi kupata nafasi siku hiyo kwa sababu halali, toba ya dhati ya moyoni inatosha, mradi una nia ya kwenda mara tu ukipata nafasi).
• Pokea Komunyo Takatifu: (Kama una ugonjwa au upo mbali na Kanisa, unaweza kufanya Komunyo ya Kiroho ukiwa nyumbani).
• Sali Rozari: Sali mafungu matano ya Rozari (Rozari moja ya kawaida ya siku hiyo).
• Kaa na Mama Maria kwa Dakika 15: Hapa usisali Rosari. Kaa tu kwa utulivu kwa robo saa ukitafakari siri au mafumbo ya Rosari. Ni kama umekaa unazungumza na mama yako wa karibu.

Ahadi ya Ajabu ya Mama Maria

Ukiikamilisha ibada hii ya miezi mitano kwa uaminifu, Mama Maria ametoa ahadi kubwa na ya kufariji sana:

Anahadi kukusaidia wakati wa saa yako ya kufa kwa kukupa neema zote zinazohitajika ili uende Mbinguni (wokovu). Hutakuwa peke yako siku hiyo ya mwisho.

Kitu cha Kukumbuka Kila Siku: "CROSS"

Ili kufanya maisha yetu ya kiroho yawe rahisi, tunaweza kukumbuka neno hili la Kiingereza C.R.O.S.S. (Msalaba):

• C (Consecration) – Kujiweka Wakfu: Kujikabidhi kwa Yesu kupitia Maria kila siku.
• R (Rosary) – Rosari: Kusali Rosari kila siku kwa ajili ya amani duniani.
• O (Offer Up) – Kutoa Sadaka: Kugeuza shida na kazi zako za kila siku kuwa sala.
• S (Scapular) – Skapulari: Kuvaa Skapulari ya Kahawia kama alama ya upendo wako kwake.
• S (Saturdays) – Jumamosi: Kutimiza Ibada hii ya Jumamosi ya Kwanza.

Kwa Nini Jambo Hili ni Muhimu Leo?

Watu wengi wanalalamika kuwa ulimwengu hauna amani. Lakini ukweli ni kwamba, wengi wetu hatujafanya upande wetu wa kazi tumepuuza ibada hii rahisi ya Jumamosi Tano za Kwanza.

Mabadiliko ya ulimwengu hayaji kwa kulalamika, yanakuja pale mimi na wewe tunapopiga magoti na kumfariji Mama yetu wa Mbinguni.

Je, utaanza nami Jumamosi ya kwanza inayokuja? Hebu tufanye hivi kwa pamoja!